رد الفريق كامل الوزير، نائب رئيس الوزراء للتنمية الصناعية، ووزير النقل والصناعة، على الانتقادات بسبب حادث المنوفية، قائلًا: “اسأل عليا دفعتي.. أسأل عليا أساتذتي في الجامعة، وقال يقولك أنت وزير غير مؤهل، على أي أساس بتقول كده، أنتوا أمنيتكوا إن أنا أمشي لكن والله أنا قاعدلكوا فيها لحد ما أموت”.
وقال كامل الوزير، في حواره للإعلامي نشأت الديهي، خلال تصريحات لفضائية TEN، مساء الأحد: “العديد من الدول اللي أنا زرتها محدش بيحط فواصل في الطرق بين الرايح والجاي، ومحدش بيعدي الخط، ومع ذلك إحنا بنعمل كدة لأن دا الكود في مصر”.
وتابع: “الكلية الفنية العسكرية علمتني أكون مقاتل، وبتعلمنا أزاي نخترع ونبقى مهندسين، اسألوا عني زملائي، وأنا بزعل وبستوعب أي نقد بروح المقاتل، هو ده كامل الوزير الفلاح المصري البسيط وأنا بشتغل في أي مكان سواء جوه الوزارة أو براها”.
ورد الفريق كامل الوزير، على الهجوم الذي شنه بعض الإعلاميين عليه، بعد حادث المنوفية الذي أودى بحياة 19 شخصًا وإصابة 3 آخرين، قائلًا: “اللي يهاجم يهاجم أنا سعيد بالهجوم، مفيش مشكلة خالص، حتى يدينا فرصة نرد ونفهم أهالينا”.
وأشار إلى، أنه نسق مع وزير الداخلية بشأن تخصيص لجان لأخذ عينات عشوائية من كل مرتادي الطريق في كل البوابات والكمائن، للتأكد من عدم تعاطيهم للمخدرات، لافتًا إلى أن الفحص سيطبق في البداية على سائقي الميكروباص والشاحنات.
وأوضح أن الرئيس عبدالفتاح السيسي، وجه بوضع خطة زمنية واضحة لإنهاء تطوير الطريق الدائري الإقليمي بالكامل، مضيفًا: الناس بتقول أنتم بتصرفوا مليار جنيه على الطريق، لا الطريق عشان رفع كفاءته وتطويره، مش هيتكلف أقل من 50 مليار جنيه.
